Home » Qormooyinka » WAASUGE IYO WARSAME: (Socdaalkii 30ka Maalmood). waxaa qoray: Dr.Xuseen Sheekh Axmed (kaddare)

WAASUGE IYO WARSAME: (Socdaalkii 30ka Maalmood). waxaa qoray: Dr.Xuseen Sheekh Axmed (kaddare)

Alle ha u naxariistee Dr.Xuseen Sheekh Axmed (Kaddare), wuxuu ka mid ahaa Qorayaashii Farta Soomaaliga. wuxuu ahaa Laashin dhaqan-ruug ah oo Suugaanta Soomaalida noocyadeeda kala geddisan curiya misana Qoraa ahaa.      

WAASUGE IYO WARSAME

    (Socdaalkii 30ka Maalmood)

Qeybta 23-aad

Intaas ka dib wuxuu Waasuge Raggii usoo jeediyey su’aalo ka sameysan tusaalooyin ku saabsan dhibaatooyinka qabyaaladdu horumarinta nolosha umadda, laakiin, uu asaga dareenkiisu ku qotamay amaba u arkayay umuuro miyiga u gaar ah, wuxuuna yiri:

-Weligiin ma aragteen Wiil reer ku madi ahaa oo loogu aaray nin uusan dilin, kana war hayn meel lagu dilay, qabiilnimo daraaddeed.?

-Weligiin ma aragteen Wiil iyo Gabar soomaaliyeed oo isjeclaaday, lana yiri isma guursan kartaan, maxaa yeelay, isma gaydaan, qabiilnimo daraaddeed?

-Weligiin xoolihiinnoo ooman nin Ceel biyo mayidinka diiday nin aan markaas u baahanyn oo aan waxba ku qasbayn qabiilnimo daraaddeed?

-Weligiin ma aragteen nin soomaaliyeed oo soomaali kale ku yiri ‘Dhulka nooga guura annagaa iska lehe, qabiilnimo daraaddeed?

-Weligiinse ma aragteen iyadoo doorasho siyaasi ah la galay oo nin ragannimo iyo cilmi isku darsaday dhacay, lana doortay nacas jaahil ah, qabiilnnimo daraaddeed.?

Intuusan Waasuge dhammayn tusaalooyinkiisii murtida lahaa ayaa Qadadii la keenay. Si weyn ayey dadkii ugu khushuuceen erayada dareenka leh ee uu Waasuge ku faaqiday ilaha dhibaatooyinka qabiilnnimo ka aloosnaayeen. Intii cuntada loo faraxalanayey waxaa dadku si xiiso leh ugu bulaamayey tusaalooyinkii Waasuge. Isla markiiba Dirir ayaa inta saacadda fiiriyey Raadiyaha daaray, waxaana ka socday barnaamij ku saabsan qoridda Af soomaaliga. Waxaa markaa Gabay ka tirinayey Sheekh Caaqib Cabdullaahi, asagoo lahaa:

Afku qaaya weynaa kolkii, qorista loo yeelay

Fartu qiima badanaa kolkii, Dhoobka laga qaaday

Qalqallooc xuruuf aan lahayn, qaladna loo diiday

Sadarradu qurxoonaa kolkii, qalinka loo fiiqay.

Waasuge iyo Warsame intii ay magaalada joogeen, waxyaalo badan oo qoridda Af-soomaaliga ku saabsan ayey Raadiyaha ka maqleen, sida qudbooyin, gabayo iyo heeso intaba. Warsame wuxuu gabaygaas ku xasuustay, Raggii ay weelka wax ku cunayeenna u mariyey gabay uu  horey uga maqlay Raadiyaha, kaasoo uu tiriyey Cabdulle Raage, ahaana:

Labaatan iyo laba aamustiyo, shaqal irmaaneeya

Amraniyo tilmaame iyo gudbe, aade iyo jooje

Isku dare xiriiriye falkaab, erayadeenniiya

Ebyaniyo haddaan magacuyaal, ku arkay Joornaalka

Mar haddii Afkeygii la qoray, Aabbe iyo Hooyo

Mar haddaan amaahsigi ka baxay, lagu agoontoobay

Abaal waxaa leh nimankii fartaa, soo abaabulaye

Amiirnimo sin iyo garab jirteey nagu abuureene.

Afafkaa qalaad iyo maxaa Eragta ii dhiibtay

Anaa macalinoo raba dad loo, furo iskuulaade.

Markii la qadeeyey ayaa nin dhallinyaro ah oo Barnaamijkii Raadiyuhu talo ku dhaliyey, uu si deggan labada Odey su’aal ugu jeediyey, wuxuuna yiri “Waasuge iyo Warsamow, waxaad nooga warrantaan ra’yiga aad ka qabtaan qoridda Af-soomaaliga iyo sida uu warkeedu idiin soo gaaray.”

Waxaa jawaabtii qaatay Warsame oo yiri “Sida runta ah Reer miyiga waa looga wanaagsanyahay Waxbarashada, maxaa yeelay, waa dad aan meel ku negeyn oo had walba raadinaya Daaq iyo Biyo. laakiin waxaan kuu sheegayaa inayan maskaxada Reer miyigu sida tiinna u qaysanayn oo aan aaminsanahay in Af-soomaaligu yahay: lama huraan waa Cawska jiilaal. Sideedana waa ceeb aan laga waaqsan in umad gob ah oo haddana ku dhaqmeysa waxyaalo Afku ka mid yahay oo ay ka dhaxashay Shisheeyihii gumeysan jiray. Run ahaantii, sababaha dhibaatooyinkaa dhaliyey waxay naga soo galeen xagga Reer magaalka, mana ahan kuwo loo garaabi karo, waxaana sideedaba ay soomaalidu ku maahmaahdaa:

“Amaano kugu raagtay

inaad leedahaa la moodaa;”

La soco Qeybta 24-aad, Berri haddii Alle idmo. 

WAXAA QORAY:

DR. XUSEEN SHEEKH AXMED (KADDARE)

x

Check Also

Wasaaradda waxbarashada Soomaaliya oo digniin loo diray

Iyada oo ay maalmahan wasaaradda waxbarashada Soomaaliya ku howlannayd qabashada imtixaannaadka guud ee dugsiyada sare ...

Somaliland Oo Dib Xuriyadiisa U Siisey Wariye Coldoon

Madaxwaynaha Somaliland Axmed Maxamud Silaanyo Ayaa Cafis U Fidayay Suxufi  Abdimaalig Muuse Coldoon Oo Lagu ...

Watch Dragon ball super