Jamhuuriyada Islaamiga ah Ee Iiraan ayaa si rasmi ah u hawl galisay, Shabakad cusub oo la mid ah sida Youtube oo kale, taas oo qaabkeeda shaqo iyo sida loo dhigay intuba aad u shaabahdo shabakada muuqalada iyo filimada ee Youtube, laakiin waxa ay tani kaga duwan tahay in ay u gaar tahay dadka Reer Iiraan iyo Muslimiinta dunida oo kaliya.

Maareeye ku xigeenka Idaacadaha iyo telefishanada Jamhuuriyada Islaamiga ah ee Iiraan oo lagu magacaabo, Lotfollah Siahkali, Oo salaasadii 11-ka December 2012-ka ka hadlay shabakadan cusub ee Iiraan hir galisay, ayaa sheegay in shabakadan loogu tala galay in dadka reer Iiraan ku shubaan, wixii filimo, suugaan iyo madadaalo ah ee ay hayaan, kaas oo u suura galinaya in ay si fudud oo ka xoriyad badan Youtube iyo facebook ay u adeegsan karaan.

Mareerye ku xigeenku waxa kale oo uu tilmaamay in mareegtani noqon doonto mid si fudud looga daawan karo dhamaan muuqaalada iyo filimada, wakaalada idaacadaha iyo telefishanada ee Iiraan baahiso, kaas oo ku dhisan, dhaqanka suuban iyo diinta Islaamka sida uu xusay masuulkaasi. Shabakadan cusub oo loogu magac daray, Mehr waa website, awood u leh in lagu shubi karo dhamaan muuqaalada uu qofku doonayo inuu ku shubto si la mid ah, habka shabakada Youtube loogu shuubto loogana daawada filimada iyo muuqaalada Video-ga ah, waxaanu muuqaal ahaan aad ugu dhow dhow yahay shabakada Youtube.

Maamulka hayada tignoolajiga iyo qalabka elegtarooniga u qaabilsan Iiraan oo ka hadlay samanta shabakadan ayaa xusay, in xornimo badan uu helayo qofka ka mid noqda dadka sanaaduuqda (User)-ka ku leh, waxa kale oo ay sheegeen in sida Youtube aan lagu xidhi doonin shuruudo tiro badan oo caqabad ku noqon kara qofka. Dhinaca kale dadka ka faalooda arrimaha warbaahinta iyo furfurnaanteeda ayaa tilmaamay in wax badan oo Iiraan sheegaysaa yihiin afka baarkooda oo aanay suura gal ahayn in uu xoriyad badan yeeshe website-kani.

Dad tiro badan oo ilaa wali intii hawada la galiyay booqday shabakada daawashada iyo ku shubista fidiyowyada ee dalka Iiraan oo lagu magac daray, Mehr ayaa aad u soo dhaweeyay, laakiin waxa ay badankoodu ka cabanayaan in aanay ilaa wali jirin wax cusub oo uu soo kordhiyay, laakiin uu guul u noqonayo muslimiinta oo gumaysi badan kala kulma adeegsiga warbaahinta iyo adeegyadooda guud ee dunida.

Waxaa Qoray Faysal Maxamed Xasan

Wixii arimo ah ee ku saabsan webka shaaciye.com kala xiriir milkiilaha webka Xuseen Madoobe shaaciyenews@hotmail.com ama shaaciyemedia@hotmail.com