Wadanka Jabuuti dadweynaha dalkaas ayaa saakay bilaabay inay u dareeraan doorashada Baarlamaanka dalkaas, iyagoo ka codeynaya ilaa 442-goobood oo codkooda ay ugu ridayaan musharaxinta u taagan Baarlamaanka dalka Jabuuti.


Xildhibaanada la soo dooranayo oo tiradoodu gaareyso 65-Mudane ayaa la filayaa in maanta la soo gabagabeeyo gelinka dambe doorashada dadweynaha, waxayna sheegeen guddiga doorashooyinka in dadweynaha codeynaya ay tiradoodu gaareyso 1744,000 qof.

Madaxweynaha Dowladda Jabuuti Md. Ismaaciil Cumar Geelle ayaa sheegay in qaar ka mid ah mucaaradka dalkaas ay yihiin qas-wadayaal isla markaana ay khalkhal gelinayaan xasiloonida iyo kala dambeynta wadankaas, wuxuuna uga digay mucaaradka iyagu ka qeyb qaadanaya doorashada inaysan sameynin dhaqdhaqaaqyo ka baxsan loolankooda.


Dhinaca kale waxaa musharaxiinta Baarlamaanka sanadkaan ka qeyb qaadanaya xubno ka tirsan mucaaradka dalkaasi, kuwaasi oo suuragal ay tahay inay u soo baxaan kuraasta Baarlamaanka, halka musharaxiinta kale ee Baarlamaanka laga soo dooranayo gobolada dalka Jabuuti.

"Waxaa jira kooxo mucaarad sheeganaya oo aan salaanta is qaadeynin maalmo kahor, sidoo kale waxaa jira wadaado doonaya inay isku milaan culimada aanu jecel nahay, laakiin ujeedadoodu tahay inay ka soo muuqdaan siyaasadda"ayuu yiri Madaxweyne Ismaaciil Cumar Geelle.

Dhinaca kale waxa uu sheegay Madaxweynaha Jabuuti in mucaaradka qaarkood ay ka yimaadeen Yurub, kuwaasi oo sheegaya inay u yeeranayaan Ereteriya si ay dowladda nooga tuurto, wuxuuna sheegay in mucaaradka intooda badan aanay ahayn kuwii ay sugayeen shacabka Jabuuti.

Ololaha doorashooyinka wadanka Jabuuti ee saakay dadweynaha dalkaasi u dareerayaan ayaa waxaa lagu arkayaa goobaha cod bixinta ciidamo fara badan, kuwaasi oo iyagu xoojinaya ammaanka goobaha ay ka dhaceyso doorashooyinka.

Wixii arimo ah ee ku saabsan webka shaaciye.com kala xiriir milkiilaha webka Xuseen Madoobe shaaciyenews@hotmail.com ama shaaciyemedia@hotmail.com