Hay’adaha Waxbarasho ee heerarka kala duwan leh ayaa kusoo kordhaya Muqdisho iyo qaybo kale oo Dalka ah, waxaana taas barbar socda tirada Ardayda Waxbarashada ku jirta oo iyaguna kordhaya, wallow ay jiraan Dhalinyaro badan oo Dhaqaalo yari darteed ka haray Waxbarashada.

Jaamacad ka mid ah kuwa Magaalada haatan ka shaqaynaya oo lagu magacaabo Modern ayaa iyadoo eegeysa dhibaatooyinka Dhaqaale ee Ardayda qaar Waxbarashada u diidaya waxay balan qaad u samaysay Caruurta ay dhaleen Askartii ku Laxaad beelay Dagaaladii ay Ciidamada Soomaaliya galeen, gaar ahaanna Dagaalkii 1977-kii ee Itoobiya iyo Soomaaliya.

Jaamacadda ayaa Ardayda Dugsiyada sare dhamaystay ee ay Dhaleen Askartaasi Naafada noqotay waxay u balan qaadday Waxbarasho Jaamacadeed oo aan Lacag ahayn.

Muqtaar Haaruun Cismaan oo ah Gudoomiyaha Jaamacaddan ayaa arrintan xaqiijiyay. Wuxuuna tibaaxay in Jaamacaddu ay doonayso taakuleynta Ardayda Soomaaliyeed ee aan awoodin inay Lacagta Waxbarashada iska bixiyaan.

Hadalka Jaamacaddan kasoo yeeray wuxuu ka farxiyay Waalidiinta dhalay Caruurtan.

Naafo badan oo Ciidamada Xoogga Dalka ka tirsanaan jiray ayaa ku nool Muqdisho, waxayna in badan Warbaahinta soo marsiiyeen cabasho nololeed oo heysata.

Wixii arimo ah ee ku saabsan webka shaaciye.com kala xiriir milkiilaha webka Xuseen Madoobe shaaciyenews@hotmail.com ama shaaciyemedia@hotmail.com