Hogaamiyaha Jabhadda Raas-Kambooni ee qaybta ka ah awoodaha ka talinaya Magaalada Kismaayo Axmed Maxamed Islaam (Madoobe) ayaa shaaciyay in Dowladda Soomaaliya ay iyadu tahay cida kaliya ee mas’uulka ah noqonaysa arrimaha maamul u samaynta Gobalada Jubooyinka.

Axmed Madoobe oo Shalay Warbaahinta kula hadlay Kismaayo ayaa xusay in Maamulkooda iminka Magaalada ka jira uu diyaar u yahay inuu Howlaha ku wareejiyo cid kasta oo ay Shacabku raali ka yihiin oo halkaas loosoo magacaabo. Wuxuuse ku baaqay in Maamul aanay Dadku raali ka ahayn la keeno.

Wuxuu intaa raaciyay in Shirweyne arrimaha Maamul u samaynta Jubooyinka quseeya lagu wado inuu ka furmo Kismaayo, Shirkaasna waxaa qaybta ugu wayn ka qaadan doonta Dowladda Soomaaliya sida uu ka dhawaajiyay Axmed Madoobe.

Axmed Maxamed Islaam wuxuu iminka hayaa Xilka Gudoomiyaha Maamulka Kumeel-gaarka ah ee Kismaayo ka jira. Maamulkaasna waxaa qayb ka ah Awoodo kala duwan oo Magaalada gacanta ku wada haya, kuwaas oo garab ka helaya Ciidamada Kenya ee halkaas Alshabab ka saaray.

Dowladda Soomaaliya ayaa dhawaanahanba waxay ku celcelinaysay inay xoogga saari doonto sidii loo heli lahaa Maamulo lagu wada qanacsanyahay oo Gobalada Dalka loo sameeyo.

Wixii arimo ah ee ku saabsan webka shaaciye.com kala xiriir milkiilaha webka Xuseen Madoobe shaaciyenews@hotmail.com ama shaaciyemedia@hotmail.com