Ra’isul wasaare ku xigeenka Soomaaliya ahna Wasiiradda Arrimaha Dibadda Marwo. Fowziya Yuusuf Xaaji ayaa shaaca ka qaadday in Dowladda Soomaaliyeed ay ku dadaali doonto sidii wax loogu qaban lahaa Muwaadiniinta ku dhibaataysan Dibadda.

Wasiiradda oo Dalka Masar ku sugan ayaa Jaaliyadda Soomaaliyeed ee Dalkaas ku nool Khudbad ugu jeedisay Magaalada Qaahira, waxayna Hadaladeeda ku sheegtay sida ay Dowladdu u doonayso wax u qabashada dhamaan Muwaadiniinta.

Wasiiraddu waxay soo hadal qaadday Soomaalida ku xiran Xabsiyada Dalal badan oo Caalamka ah oo Masar ay ku jirto, kuwaas oo ay u ballan qaadday inay Dowladdu u dadaali doonto sidii loosoo deyn lahaa.

Waxay kaloo Wasiiraddu ku nuuxnuuxsatay arrinta Dhalinyaro Soomaaliyeed oo qaarkood loo diiday inay Waxbarashada Heerka Labaad ee Jaamacadda ama Shahaadada Master-ka ku diyaariyaan Wadanka Masar iyo Dhalinyaro iyaguna ay Dowladda Turkigu u keenay Masar inay Waxbarasho helaan oo iyagana laga horjoogsaday fursadahoodii. Waxayna Wasiiraddu kuwaas u balan qaadday iyagana in arrintooda la xalin doono.

Wasiiradda ayaa Soomaalida ku nool Masar iyo Caalamka kaleba ugu baaqday inay ka qayb noqdaan dadaalka haatan ka soconaya gudaha Dalka ee wata Dib u dhiska iyo horumarintaba.

Wixii arimo ah ee ku saabsan webka shaaciye.com kala xiriir milkiilaha webka Xuseen Madoobe shaaciyenews@hotmail.com ama shaaciyemedia@hotmail.com